Շարական Սուրբ Յովհաննու Մկրտչին

Տօն Սուրբ Յովհաննէս Կարապետին եւ Աթանագինէս Եպիսկոպոսին

Օրհնութիւն ԳՁ

Զմարգարէ բարձրելոյն եւ զթագաւորին զինաւոր. որ եւ ՚ի ծնունդըս կանանց մեծ կոչեցաւ. յօրհնութիւնըս հոգեւորըս պատուեսցուք։

Զմիածնին կարապետ եւ ըզբանին ըզձայն. որ յորովայնէ զՔրիստոս յառաջ գուշակեաց. յօրհնութիւնըս հոգեւորըս պատուեսցուք։

Զյանապատի բընակիչ եւ շնորհացըն քարոզող. որ եւ ՚ի դըժոխս ըզփըրկութիւն քարոզեաց. յօրհնութիւնըս հոգեւորըս պատուեսցուք։ ֍