ՇԱՐԱԿԱՆ

Շարական Սուրբ Հոգեգալստեան

Ս. Հոգեգալստեան 3րդ Օր

Օրհնութիւն ԲԿ

Այսօր երկնայինքն ուրախացան ընդ երկրաւորացս նորոգման. քանզի նորոգողն էից Հոգին էջ ի սուրբ վերնատունն. որով նորոգեցան դասք առաքելոցն։

Այսօր հողանիւթեայ բնութիւնս ցընծայ ընդ Հօր հաշտութեան. քանզի որ եբարձ զՀոգին ի մարդկանէ մարմին եղելոց, դարձեալ վերըստին ըզնոյն պարգեւէ։

Այսօր մակունք եկեղեցւոյ տօնեն ցընծութեամբ զգալուստ Սուրբ Հոգւոյն. որով զարդարեցան ի զգեստըս լուսափայլս եւ գերապայծառս. երգեն ընդ սրովբէսն զերեքսըրբենին։

Որ զմիաբանեալսն յաշտարակին բաժանմամբ լեզուացըն քակեաց. այսօր ըզբաժանեալ լեզուս ազգաց միաբանեաց դարձեալ ի սուրբ վերնատունն. ամենայն հոգիք օրհնեցէք զՀոգին Աստուծոյ։

Փառք Հօր եւ Որդւոյ եւ Հոգւոյն Սըրբոյ։

Որ էջ Հոգին Տեառն եւ առաջնորդեաց երկոտասան ցեղիցն Իսրայէլի ի յանապատին. այսօր երկոտասան առաքելոցն առաջնորդէ ի յաւետարանն. ամենայն հոգիք օրհնեցէք զՀոգին Աստուծոյ։

Այժմ եւ միշտ եւ յաւիտեանս յաւիտենից. ամէն։

Որ ելից Հոգին Տեառն ըզԲեսելիէլ ճարտարապետ խորանին. այսօր շինէ զմարդիկ խորան Սուրբ Երրորդութեանն. ամենայն հոգիք օրհնեցէք զՀոգին Աստուծոյ։