Շարական 38րդ աւուր Յարութեան

Համբարձի ԳԿ

Տեսիլ փայլակնաձեւ զըւարթնոյն ի վիմին հընչեցեալ առ խընկազգեաց կանայսն փարատեցոյց զերկիւղալից տըրտմութիւնն։

Պահապանքըն պակուցեալ ահաբեկ լինէին, եւ կանանցն աւետարանեալ, մահ մահու յաղթեաց եւ ծանուցաւ մահ։

Քարոզս առաքելով առ երջանիկ Առաքեալսն, փութացարուք ի Գալիլեա եւ տեսանիցէք զկենագործողն ըզՔրիստոս։

Յանճառ փառաց խոնարհեցար եւ ըզգեցար ըզհողեղէն բընութիւնս. վերառեր զանկեալն ի գլորմանէ յանմահական ի կեանս. ըզքեզ օրհնեմք անապական բանդ Աստըւած։

Փառք Հօր եւ Որդւոյ եւ Հոգւոյն Սըրբոյ։

Անպարտականըդ մահու դատապարտեալ ի վերայ խաչին. որ փոխանակ դառնութեան պըտղոյն արբուցեր մեզ ի տիգախոց կողէդ. ըզքեզ օրհնեմք անապական բանդ Աստըւած։

Այժմ եւ միշտ եւ յաւիտեանս յաւիտենից։ Ամէն։

Առաքեցար ի դըժոխս ցուցանելով ըզզօրութիւն Աստուածութեանդ. ջախեցեր ըզգլուխ խարդախողին, խափանեցեր ըզզօրութիւն մահու. ըզքեզ օրհնեմք անապական Բանդ Աստըւած։